第62屆威尼斯影展
由鄭秀文（Sammi）和吳彥祖主演的電影《長恨歌》，昨日在威尼斯影展中舉行首映禮，坦言拍攝《長》片期間因無法抽離角色引致情緒波動極大的Sammi，穿上超低胸大露背晚裝到場，表現風騷，重現豔光。 記者何永寧、仇志德威尼斯直擊
首次參與國際性影展的鄭秀文，昨日香港時間凌晨約四時（威尼斯時間晚上約十時），身穿由TomasChan設計的超低胸大露背晚裝，現身《長恨歌》首映禮，打扮極為惹火養眼，雖然Sammi一向被譏為「飛機場」，但穿上超低胸晚裝的她，仍隱約見到小山丘，引來現場外籍男士的口哨聲四起，而Sammi抵埗後不停向在場影迷揮手微笑，表現極為風騷和興奮。
觀眾感動
讚較《花樣年華》好看
而《長》片放映完畢後，全場觀眾均起立拍掌，掌聲持續十分鐘之久，關錦鵬、Sammi和吳彥祖見反應如此熱烈，亦起身向觀眾鞠躬回禮。據悉有外國傳媒指《長》片較《花樣年華》更好看，也有內地傳媒指看罷該片後，指「作為一個女人，真的感動不已」。
首映禮結束後，Sammi換上便服出席電影公司的派對，對於觀眾拍掌拍足十分鐘一事，Sammi笑說：「我第一次參加呢類國際影展，唔知點為之好，其實我最緊張都係觀眾反應，因為之前我拍嘅多數係笑片，冇諗過拍正經戲。其實部戲唔止咁短，有好多戲我都好滿意，但為咗劇情而刪剪咗。」
犧牲有價
「有機會嘗試新嘢」
早前盛傳Sammi情緒波動極大，又經常將自己困在房間中，被懷疑患上抑鬱症，Sammi昨日解釋是因當時無法抽離角色所致，她說：「戲裏面我由後生演到老，又同幾個男人發展感情，有段時間真係抽離唔到，情緒upanddown，波動好大。我留喺房嘅原因係希望relax吓，放鬆自己，同埋睇吓playback，睇吓有乜嘢要改善嘅地方。導演見我抽離唔到，都有幫我放鬆，陪我去卡拉OK同行街，嗰段時間真係好辛苦，不過犧牲同辛苦係有回報，但所謂回報唔係參展，而係有機會嘗試新嘢。」
對於被指在影展中攞獎呼聲高，Sammi笑說：「唔諗咁多，十個人當中有三個認同，我已經覺得好足夠。」
近日Sammi為某雜誌寫專欄，所繪畫的圖畫被心理學家分析指有抑鬱傾向，但Sammi連聲否認說：「心理學家十個有十個唔同見解，佢哋睇嘅嘢同事實差天共地，我冇唔開心，啲畫係我好耐之前畫，只不過攞番出嚟再寫啲文字落去。」
滿手紅疹
稱食羊肉三天太燥
香港時間昨日約六時，Sammi又在下榻的酒店出席記者會，問她為何在首映禮作如此性感打扮時，Sammi笑說：「配合場面吖嘛，唔通着樽領咩？而且唔知幾時再有機會行紅地氈，所以咪着靚啲囉！我着嗰陣助手都有幫手，出門口時左照右照，肯定冇走光先至出門口。」問到Sammi為何手上長滿紅疹時？她說：「早排同關錦鵬去北京配音，食咗三日羊肉打邊爐，搞到自己好燥，結果返嚟食咗三個星期中藥。」
提到影展賽果將於香港時間明日凌晨十二時公布，問Sammi心情如何？她說：「好似代表香港參賽咁，覺得好光榮好有使命感，如果真係攞到獎，個獎都係屬於香港。其實有冇獎都好，總之友誼第一，我本身都好鍾意李英愛，李英愛好值得去攞呢個獎。」
