澳門第二季有八百幾間新公司成立，比舊年同期增近一半，唔少係零售商，包括本土同外資連鎖店，形成商舖租務活躍。中原（澳門）商舖部主管吳業榮話，𠵱家投資舖位，回報逾五厘。
板樟堂、新馬路及南灣一帶，繼續係租舖嘅選址熱點，租戶以零售、飲食及連鎖品牌店最多，例如信達城商場、天神巷一帶，係年輕創業者聚集地，舖位月租萬零至三萬幾。
近關閘嘅信達廣場，由首度進軍濠江嘅日本零售商承租兩萬呎，打算大展拳腳。
吳業榮話，之前重有啲日資時裝連鎖店、旅行社同食肆喺澳門租舖開業。
另外，進駐濠江嘅兩大港資連鎖店，繼續爭住開舖，近排夾埋租咗近十個舖，五百至一千呎，月租三萬至五萬。