鄭中基噚日喺商台接受訪問，話呢排佢又忙緊不停寫歌。吓！又寫歌，佢啱啱先出咗碟喎，鄭中基話：「係呀，因為我想喺演唱會前出多一隻碟，可能會多啲快歌，演唱會時可以同歌迷拉近啲距離。」講到快歌就梗係要跳舞啦，不過佢就話自己係十八銅人，一個字「硬」，佢話：「跳舞係我死穴同弱點，演唱會時都唔知點算好。」