灣仔區議會主席黃英琦911有機會見曾副主席，八方問佢有乜同大曾講，佢笑住話：都唔知有冇得埋身。講到區會工作，黃英琦一直為喜帖街居民同業主奔走，希望市區重建局林中麟可以高抬貴手，保留舊貌或者畀居民可以選喺原區安家，但係林總裁點都冇得傾，賠錢算數。咁佢手上有尚方寶劍，可以強制收樓，又係奈佢唔何。但係公道自在人心，有時錢唔係一切，雖然聽講都賠得唔錯。
限期上月底已到，即係話已經進入強制程序，黃大小姐眼見冇力再挽，決定做其他有意思嘅事，就係出版一份「舊區報」，大約印二三萬份，前後出三期，希望引起大家對保育舊區、重新發展的關注。
要派免費刊物，當然要錢，黃主席於是向區議會申請十四萬大元，點知有關人士收到風，竟然出動高層使橫手，游說區議員唔好通過，好彩黃主席朋友多，知道有對手，最後都順利通過。
八方問位高層係邊個，黃主席話不便公開，不過大家都估到啦！
傳真︰2623-9278
電郵︰[email protected]