自從泰興光學（389）事件打擊芬佬對工業股信心後，負債唔算低的建滔化工（148）走勢一直偏弱，其後突然批股集資減債，更令市場疑慮，股價走勢相當肉酸。
好彩日前公布中期業績夠靚，加上老闆又肯站出來講清楚，建滔股價終於有反彈，至於能唔能夠令芬佬重拾信心，經紀黃話要睇多一陣。建滔中期盈利6.88億元，比去年同期上升26.2%，中期息派12仙。
經紀黃話，建滔業績靚，主要係因為去年收購依利安達後，兩間公司垂直整合，依利安達從建滔採購原材料價格相宜之故，而早前減債後，家陣負債比率已經低咗好多，所以股價相對穩定番。
建滔昨日升7.92％，收19.75元，成交金額8482萬元。
另外，早排經紀黃講過大陸地產股有轉勢之象，昨日又輪到向來貨疏的合生創展（754）發威，大升8.57％，收7.60元。合生將在9月13日公布中期業績，市場預計唔會差。
慕容小初