今年失誤纍纍嘅考試及評核局，公信力掃地，不過佢哋好似仍未明白作為一個考評機構，信譽係幾咁重要。噚日考評局就如何處分五名涉及計錯分事件職員開特別會議，八方一眾行家去等消息，一如往常般，喺佢哋開會對面嘅另一間會議室等候。
等咗一陣，公關大員走入嚟，話間會議室俾人訂咗嚟開會，記者如果想繼續等，可以到𨋢口大堂企。大家當然識做，結果一班記者由四點等到六點九開完會，發現都冇人用嗰間會議室，考評局明顯有人講大話，搞到班行家鬼咁㷫。
八方覺得考評局如果唔想記者太接近會議室（雖然喺對面會議室乜都聽唔到），何不光明正大，點解要講假話，自毀信譽呢？咁以後重點叫人信考評局解釋呢？
傳真︰2623-9278
電郵︰[email protected]