個市沉悶，恒指跌58點。滙控（005）算醒神，又升40仙。喺過去6日，唔覺唔覺升市佔5日，由124.50元爬上127元。要解釋，可能係啲錢搵嘢買，大笨象偏低，落後其他大藍籌，於是成為吸納對象。
滙控3大成交金額C輪依次係9011、4885、4906，交投較前市大增9成至1.8倍，有嘢睇。
滙控C輪3807：滙控C輪是日升得最勁嘅係3807，收30仙，升幅20%。呢隻輪，啖啖肉或啖啖血，已經平水，槓桿率42.3倍，正股升跌1元，隻輪就升跌10仙，即係33%，所以屬於高度搏殺嘅C輪。博唔博得過？難講，因為下周一最後買賣，得兩日賭。
滙控C輪4906：炒滙控C輪想高度搏殺，又唔想受屆滿期所限，及萬一睇錯正股方向時，好易做快閃黨，可以揀4906，此輪成交金額近4千萬元，係滙控第3大熱門貨，易上車易落車。
4906現價33.5仙，溢價與槓桿率同最熱門嘅9011完全一樣，但壽命長過9011，多20日，引伸波幅又細少少，所以靚過9011。
章盛