八方有日見到扶貧委員會秘書長謝凌潔貞，問佢呢輪忙乜？佢話咪忙於四圍去參觀同研究社會企業，希望搵到啲成功例子等大家可以借鏡，推而廣之到協助貧困人士搵工作，自強不息，八方希望佢成功啦！
「社會企業」呢個概念，其實喺外國好流行，即係話，間公司唔單只在商言商為賺錢，重有社會責任，好似鄰舍輔導會同懷志匡業等等都有成功例子，佢哋主要協助競爭力稍差嘅人士投入社會。
八方覺得香港最可愛，如果勤力，一定唔會餓死。不過，話說回來，貧窮未必一定係壞事，呢個係令人發憤嘅主要元素，所以話扶貧，要小心好心做壞事，要扶得其法。
記得嫻姐年初叫老董一定要正視貧窮問題，佢老哥聽話成立個扶貧委員會，命唐唐做主席，但係冇幾耐老董下台，呢壇嘢要煲呔執手尾。不過，呢樣嘢都有票嘅，所以好多議員都有參與，大狀湯家驊最近去英國就同首相府屬下一個扶貧小組嘅總裁傾咗好耐，遲吓重會發表心得㖭。
傳真︰2623-9278
電郵︰[email protected]