領匯再度上市，應該冇阻滯喇啩？立法會議員陳偉業話佢有可能再度挑戰，睇吓點，假如仍然係搬出賤賣資產呢套，根本毋須理會，如果要打官司嘅話，照計領匯應該贏梗。之不過，領匯班律師團雖然係大名牌，但去年居然棋差一着，唔披露類似盧少蘭一類嘅訴訟風險，實在令人頹喪。吃過一棍之後，呢班高薪律師應該醒醒定定，唔會俾甚麼人士偷雞喇啩。
領匯上市，如果孳息率仍有六厘幾，十分吸引，美國、新加坡嘅REIT掇全年受到投資者追捧，價錢抬高晒，孳息率降到三厘幾四厘，相形之下，領匯肯定有上升空間，左丁山上一次申請領匯，獲配三手，得啖笑，借孖展申請嘅老友，全部蝕息蝕到肉痛。今年左丁山仍然唔會借孖展申請，以保平安，慎防招股書發出之後，又有麻煩友告上法庭，搞到歷史重演。
今年領匯宣布申請上市，唔再由房屋及規劃地政局常任秘書長梁展文主持，改由房委會產業分拆出售督導小組陳家樂律師出鏡，據一啲知情人士講，梁展文有鑑於去年出師不利，不如退居幕後，由陳家樂站在前台好過。陳家樂個名幾好，大家快樂、家家快樂，領匯上市順利，散戶人人起碼一手嘅話，有幾十萬人笑得快樂！事後孔明，展文喎，諧音係剪文，成份招股書?上市文件，俾人剪咗，化作碎紙，點會上到市呀！果然無端端殺出一位盧少蘭，揮起大刀一剪，領匯上市文件就化為烏有。換了家樂上場，家和萬事興，大家樂融融。
今時今日嘅焦點，唔係領匯是否上市順利，而係領匯管理層有冇辦法改造屬下商場、停車場，完全摒棄房委會之官僚作風，追上私營商場嘅辦事效率，為基金單位持有人（相等於股東）帶來利益。假如領匯以公僕方法辦事，你愛咯。