周杰倫（阿Jay）自從喺台灣俾雜誌影到佢舉起中指做粗口手勢嘅相之後，佢阿媽同傳媒都鬧佢，搞到阿Jay要出嚟道歉，唔知係咪因為咁，佢對傳媒有仇視心態，呢輪佢到威尼斯影展，前日重順道喺嗰邊拍MV，啲中港台記者咁啱撞到，諗住順便影相，點知佢發現記者就一支箭咁返入酒店，無幾耐搵個人扮佢，想玩調虎離山計，點知記者冇上當。
連開六傘
二十分鐘後佢終於走出嚟，之不過佢搵工作人員開住幾把遮擋住記者嘅鏡頭，直到佢行到碼頭上船，重喺船上面開住六把遮嚟遮住自己，又搵人攞部DV影番啲記者。馮仁昭覺得阿Jay呢啲做法幾幼稚，佢可能真係當自己係荷李活巨星！
阿Jay真係要求神拜佛保佑自己唔好跌，唔係到佢走下坡想傳媒幫番佢就難，今日佢有咁紅，傳媒都出咗唔少力，𠵱家紅咗就變臉，咁忘本邊度有大將之風？記者去到威尼斯咁遠做嘢，影你一張相都怕蝕，使唔使做到咁小家呀！
