黎姿正身在寧夏銀川拍攝民初劇《火舞黃沙》的外景，更初嘗瞓窯洞、在大風沙下吃飯盒兼一天內嘗盡四季氣候等滋味。雖然拍攝環境惡劣，但黎姿仍表示這是一次難得的生活體驗。
黎姿、陳豪、蔡少芬及佘詩曼，目前正身在銀川，拍攝《火舞黃沙》外景。大隊早前去了陝北的窯洞區拍攝，令黎姿大開眼界。她昨日接受電話訪問說：「我第一次去到大沙漠，一日之內可以遇到四季天氣，同第一次喺窯洞入面瞓覺，重係瞓喺個炕度，炕入面可以燒炭取暖，覺得好得意！不過因為好乾燥，所以成日要搽住油，但確係一次好好嘅生活體驗。」
難忍風沙割面
而最惡劣之處，乃是在沙漠解決三餐。黎姿說：「因為風沙實在太大，基本上一擘開個口就會入沙，打開個飯盒，都未食，就全部都係沙！我同阿佘（佘詩曼）惟有用最快速度打開個飯盒食一啖，然後即刻合番埋佢；有時風沙吹埋嚟入眼兼割面，但又要擘大對眼講對白，真係好辛苦。」
黎姿在劇中，亦有多場驚險場面，她說：「有場係要我企喺懸崖邊，同林保怡用槍互指，我有半隻腳係踏出崖邊，個武師就用條威吔拉住我，如果唔小心跌落去，一定死梗，但係個鏡頭真係好靚，死就死啦！」
