中半山老牌豪宅愈老愈矜貴，美聯中半山豪宅營業董事馮劍釗話，過去一個禮拜一連錄得三宗樓齡四十年以上嘅老牌豪宅成交，呎價由八千至過萬。啱啱成交嘅麥當勞道龍景樓，四十一年樓，高層二千四呎單位，以二千二百三十萬賣出，呎價近九千三，原業主三年間勁賺近千二萬。
同日堅尼地道高雲大廈，四十七年樓，面積一樣，成交價超過千九萬，每呎八千。最誇張嘅係幾日前成交嘅堅尼地道四十號南園大廈，樓齡四十五年，千五呎單位賣一千五百四十萬，呎價超過一萬蚊。
中半山向來以地勢較高、樓齡較新嘅豪宅為焦點，大額買賣離唔開嗰幾個大盤，堅尼地道同麥當勞道沿路高齡大廈無乜人注意。由於一線豪宅近排冇乜動靜，造就批舊樓成主角，一連錄得三宗矚目成交。