真雪溜冰喺香港唔太流行，其中一個原因係場地唔夠，但遲吓情況會好啲。除咗政府話會喺將軍澳搞番個溜冰場，嘉里九龍灣企業廣場五期嘅購物中心MegaBox亦將會有一個，而且重係世界級數，話唔定可掀起冰上運動熱潮。
嘉里喺集團刊物內提到，溜冰場由亞洲體育有限公司設立，公司兩位高層係冰上運動愛好者，曾經喺外國舉辦過國際賽，希望將呢類大型賽事引入香港。呢個場有二十六米闊五十七米長，有一千個固定座位，另可再加幾千個臨時座位，足夠搞大賽。唔單止咁，場地重可以搞演唱會、展覽或其他表演，如果物盡其用，相信日後會搶到一批人流。
另外，嘉里嘅何文田山道十五號豪宅盤，快將登場，份刊物就講吓嗰區嘅歷史，好似太平道、勝利道同自由道，都係為咗紀念二次大戰結束而命名，食正呢排二次大戰結束六十周年話題。