近排幾乎日日都有配股活動，雖然多數係中型股份，但隻隻集資額都係億億聲，繼前日太平洋航運（2343）同豊采多媒體（764）配股後，昨日又輪到電鑽股創科實業（669），集資額重高達20億咁多。經紀黃話，好彩聽聞幾隻股份配股都叫做去得晒，反映市場仍然有足夠資金。
據聞創科確係有唔少芬佬要咗貨，但聽講有部份貨源去咗對沖基金，所以唔排除復牌後股價會波動。
豊采多媒體早前轉型搞賭船，當時已過咗濠賭股最當炒嘅時間。不過，今次佢搞批股，集資額成1.36億元咁多，昨日復牌股價不但企得住，重升4.1％，真係唔到你唔服。隻股昨日收0.38元，較配售價0.34元高出4個仙。
豊采阿媽中國星（326）都即刻話同1間東南亞博彩公司傾緊投資，但昨日股價就倒跌8.7％，收0.315元。
經紀陳話，中國星舊年無話搞博彩業，股價都可以炒到上1元樓上，家陣股價相對處於低位，若唔怕風險高，都叫做博得過。
慕容小初