曾慶紅副主席明日就到，禮拜一為迪士尼主禮，天文台竟然話當日可能間中有驟雨，真係豈有此理！我偉大領導來港親民，以示皇恩浩蕩，唯一條件只是其間不准有負面消息。如果個天咁唔畀面要落雨，煲呔咪要大大問責囉。
煲呔盡心盡力為中央效命，已經俾班民主派生馬騮以及愛國擁共人士搞到暈頭轉向，𠵱家個天唔聽話，真係冇乜辦法，惟有呢幾晚，晚晚同曾太喺山頂維多利亞宮向天禱告，求佢唔好落太大雨，更加切勿行雷閃電，否則報紙佬大把口水噴，到時點威都冇用。
煲呔聽天由命之際，有多事之徒就安慰佢，話唔使太驚，因為中國有句俗話，叫做「貴人出門招風雨」，咁曾副主席係嚟大派禮品嘅貴人，特首又何必太杞人憂天呢。此語一出，煲呔果然如夢初醒，決定盡人事做得幾多得幾多，喺曾副主席抵港前搏命洗太平地、又掃黃又掃毒，發揮佢當年做清潔大隊長嘅精神。
全速搞掂派米團體
好似一知道副主席會去老人院探訪，佢就搶先去熱身，重命令民政同有關團體一定要全速搞掂班派米團體，唔好破壞特區喺副主席心中嘅印象，以為香港連飯都冇得開。話晒副主席都有番咁上下年紀，見到啲老人家咁慘，心裏都戚戚然，萬一想起成日強調老有所養嗰位特首咪弊。
至於奧運馬術比賽，又係中央大禮，副主席一話去參觀場地，肥平同眾人媽打李麗娟就匆匆上京斟數，希望有啲新嘢，趕得切講畀副主席聽。
總而言之，今次大曾來港，不容有任何失誤，三司十一局已經接晒order，警隊全面戒備，提防法輪功、程翔支持者同慣常請願客搞喎場大騷。所以曾副主席位中學同學朱育誠喺北京話要搜集起草基本法條文嘅原意，以備不時之需，呢個說法，馬上被喬曉陽撲滅。𠵱家要六百萬同胞開心迎駕，你朱育誠亂出牌博出位，梗係即刻俾人拉埋牆啦。
如果一切順利，副主席高興，禮物都會大件啲，反正廣東省省長黃華華會陪同前來，粵港兩地有乜嘢擺唔平，可以喺御前搞掂。八方成日喺度講有禮物，有高人就指點話中央㩒住上海不准起迪士尼已是大禮，香港人身在福中不知福。
至於班民主派想講政改，高人就話未係時候，因為副主席係嚟親民，如果想傾啲咁具體嘅題目，不如搵幾位法律專家同大家閂埋門先傾。
傳真︰2623-9278
電郵︰[email protected]