今日返工見到兩個新面孔，都係啱啱大學畢業嘅妹妹仔。佢哋做嘢係咪特別搏就未知，不過睇佢哋嘅衣着就好搏，毋懼公司冷氣凍到震，均以一身吊帶小背心、超短迷你裙上陣，梗係想喺公司識番個會計師啦！
見到佢哋咁樣，都覺得係時候要裝扮吓自己，費事顯得自己好似好老土咁。即刻約Josephine食Lunch，順便行吓Landmark睇吓有冇收穫。
自從有咗囡囡，衣着打扮都改變晒，唔係身份唔同而要作出改變，而係有實際需要。除咗多數揀圓領衫，怕BB會四圍扯令你走光外。質料上盡揀棉質，因為BB未學曉吞口水，經常口水長流，有時抱佢瞓會搞到件衫濕晒，棉質衫就最吸水。而當BB出牙時，因出牙會刺激口腔，會令口水分泌更多，起碼到兩歲先至減少流口水情況。諗到呢一點，即刻放低手上嗰件Dior喱士背心，最後靚衫買唔成，反而買咗幾條口水肩畀囡囡！（五）