李超人噚日去聖保羅男女中學出席捐巨款活動，喺嗰間中學讀咗好多年嘅大仔李澤鉅同老婆王富信亦都一齊重遊母校。雖然個儀式晨咁早舉行（八點半左右），不過王富信嘅打扮一啲都唔馬虎，拍得上夜晚去ball咁，除咗set個靚頭外，重着咗條吊帶裙仔，唔講都冇人知佢生咗三個女。如果佢唔係李家媳婦，啲瘦身公司實搵咗佢拍廣告。
講吓超人嘅「3G」，不過唔係3G手機，而係三個granddaughters，最大嗰個已讀緊幼稚園。李家上下噚日盡出，又出錢又咁畀面，莫非為咗三個孫女將來謀定後路讀名校？超人噚日被問及時，笑笑口，但唔答。
超人噚日除捐錢畀聖保羅外，重每名聖保羅嘅學生都送書，係由佢寫序嘅新書《三國世紀──曹操之霸者勝出》，篇序嘅標題好勁，題為〈愚昧是世上最大的敵人〉，學生仔，收到啦。
傳真︰2623-9278
電郵︰[email protected]