唔知係咪因為老頂曾慶紅快將抵港，煲呔日日都出嚟蒲頭爭曝光，好似噚日咁，佢又去咗巡葵青區，少不免同啲老人家同埋小朋友一齊玩。
佢喺安老院見到一位陳老先生，風雨不改日日去探望太太，令到煲呔好感動，咁感動完之後又同啲老人家一齊砌字同玩拋波遊戲。
當然最過癮嘅係佢去探望一班患咗老人癡呆症嘅老人家，佢哋正喺度攻打四方城，煲呔一到場就大大聲自我介紹，重問人「叫胡未？」班老人家好似唔記得輪到邊個摸牌，煲呔重提佢哋唔好小相公，睇嚟佢都可能係雀林高手，有啲技癢。
煲呔其後參觀位於青衣長亨嘅一所幼兒中心，佢一見到啲小朋友就好似執到寶咁，猛話香港女人生得少，所以每一個小朋友都好緊要，要好好照料佢哋，因為佢哋係香港難得嘅生力軍、財富同接班人喎。
傳真︰2623-9278
電郵︰[email protected]