中環長江中心最近有「大家樂」開業，在此返工嘅大量ＯＬ、文員唔使行半里路至有飯食，好事也。大編輯在長江中心停車場泊低架車，到大家樂飲杯可樂，五蚊冇找。飲完行過去新酒店置地文華，好近啫，皇后大道中嘅置地文華開張後，加上隔壁嘅超豪百貨公司，廸生潘公子嘅HarveyNichols嘅玻璃外牆裝飾，全部金碧輝煌，成條街都光猛晒。
大編輯入到置地文華食飯，想話叫杯可樂，一睇價錢，好似係六十八蚊一杯，心諗可以到大家樂飲到飽，都係無謂咯。左丁山笑佢知慳識儉：「喂，喺文華飲可樂，與在大家樂飲可樂，完全唔同層次，唔同class噃！」大編輯話：「入咗肚咪都一樣！」
香港啲酒店近來唔憂冇生意，每年九至十二月係旅遊旺季，十月開始更大旺特旺，因為每年第四季嘅旅客人數，佔咗全年旅客人數26%︱28%左右，今年十二月有世貿會議，部長級人馬湧嚟香港，有乜法子唔逼到爆。一位專做inbound（來港）遊客生意嘅旅行社負責人同左丁山講：「滿就滿梗嘅嘞，不過肯畀價錢嘅話，仍然可以訂到房；要六百蚊一晚嘅，一定冇房！」左丁山問佢：「一啲示威人士來港，會唔會畀三千蚊住一晚？」負責人話：「呢類人士邊度畀得起呀，佢哋梗係book唔到酒店房啦。事實上，如果我係酒店揸弗人，邊度想示威者入住吖，未夠頭痛過咩，一聞到陣示威者氣味，我一定會喊高啲價。」
負責人話，據過往外國經驗，酒店對示威者最好避之則吉。不過前門拒虎，後門進狼，一啲內地遊客，受港方招待來港遊覽，到五星酒店入住嘅話，五星酒店往往暗裏叫苦，因為差唔多次次都發生賴帳拗數（例如飲咗、食咗mini-bar裏面嘅飲品、朱古力）事件，房間內可以攞得走嘅，都會俾人攞去，內地客走後，房間好似掛完八號風球。不過冇計啦，每年二千二百萬遊客之中，一半以上係內地同胞噃。