港股全日在65點內窄幅上落，成交只得165.38億元，可謂悶到暈，恒指收報15224，升63點。
東方工業（353）早市曾升至1.72元，升破1年高位，但午後就插水下挫至0.51元，收報0.75元，跌幅達55.6%。市場好自然地傳話有人被斬倉，但i師傅就唔係咁睇，佢話可能係之前有人以低至每股0.12元行使換股債，所兌成的2.75億新股出籠有關。
若以東方工業噚日平均成交價1.015元計，呢批股份值2.79億元，帳面獲利2.46億元。其實就算有關股份在低至0.50元沽出，仍獲可觀利潤，因此大戶食胡的誘因十分強。至於點解唔善價而沽，反而大手劈價？因為每逢出現斬倉，就有散戶敢死隊入市撈底博反彈，有人可能吼準散戶這種心理而進一步散貨。
富豪為急挫解畫
富豪（078）正式宣布不與威尼斯人合作澳門項目，改為獨自向澳門政府申請澳門酒店地皮自行發展，富豪冇咗呢個持有澳門賭牌的拍擋，股價應聲挫9%至0.70元，重搞到富豪要召開臨時記者招待會為此事解畫。
太平洋航運（2343）前晚有管理層股東沽出5000萬股，套現逾2億元，每股作價3.90元。不過，噚日股價仍然企硬，收報4.10元，只跌0.6%。噚晚再有股東沽貨，配售1.98億股，每股作價3.90-4.05元，套現最多8億元。據聞有成五至六倍超購，唔知會否有助股價企穩呢？太航估計全年派息最少60仙，以收市價4.10元計，股息率高達14.63%，絕對吸引，但呢班股東仍然唔肯持貨收息，當然會令阿虎有戒心啦。
阿虎