國家副主席曾慶紅今個周末移駕特區，為迪士尼樂園主持開張大典。大曾親臨，小曾（梗係煲呔曾蔭權啦）自然要盡地主兼門生之責好好招呼，八方收到八卦界消息，話有關方面正為曾主席度身訂做「極速遊園攻略」，因為佢得好少時間同米老鼠玩。由於事關國家領導人保安事宜，所以個計劃係國家最高機密，連米老鼠都未知有無機會同大曾合照。
大曾遊園安排屬國家機密，冇乜人肯透露風聲，但八方冒住步程翔後塵嘅危險都要講吓。有關方面話，由於迪士尼象徵美國文化，所以以往中國領導人外訪，就算經過都過門不入；被指親美媚外事小，做出損害國家民族感情嘅事就大鑊，隨時有數以萬計愛國分子衝去美國領事館掟石掟雞蛋，就難以收科，故此大曾今次去到迪士尼樂園，一定好小心言行。
但係一場嚟到，唔四處睇吓點都講唔通喎，經過一輪分析後，有人初步擬訂大曾遊園攻略，當日主持開幕儀式後，先坐樂園小火車巡視一周，咁做既可一次過睇勻成個場，又可以同四周嘅遊客打招呼，安坐車中就達到親民效果，好得。
同小矮人影相英明神武
迪士尼表面上為小朋友而設，實際成年人更趨之若鶩，玩機動遊戲自然唔少得，咁如果大曾有時間，最有機會玩飛越太空山，一來呢個遊戲深受長者歡迎，啱晒大曾；二來佢喺中國官場同共黨打滾多年，歷盡人事浮沉，升升跌跌隨時激過過山車，玩一轉SpaceMountain濕濕碎啦。
作為貴賓，大曾同邊位迪士尼朋友影相大有學問。園方梗係希望米奇同米妮可以同國家領導人合照啦，但考慮到領導人要時刻擺出英明神武形象，大曾辦公室可能會想喺白雪公主許願洞附近取景，不過白雪公主唔需要出場，派七個小矮人就得嘞。
迪士尼已經擇咗下晝一點舉行開幕大禮，曾主席之後就會鬆人去機場，為咗安全起見，樂園上晝唔會畀人試玩，但一點之後，就正式開放。
至於前一晚曾副主席個party，好多人都畀足面，好似何鍾泰議員本來911要去迪士尼試食，都決定唔去，灣仔區區議會主席黃英琦亦收到911party嘅請柬，佢話，十八區區議會主席都有請，係第一次，所以上晝去完迪士尼，入黑就會着靚靚去見副主席喎。
傳真︰2623-9278
電郵︰[email protected]