隔晚美股彈升，恒指最高升過110點，埋單只有進帳63點，好友有啲唔順氣。兩隻重磅股中移動（941）與滙控（005），總共拉高恒指50點，即係其他31隻恒指股夾埋只係升得14點。
大市暫時不脫上落格局，如果確實係咁，揸高溢價?高引伸波幅嘅窩輪比較蝕底，因為溢價收縮同引伸波幅下跌對輪價嘅傷害，正股微微上升都補唔番。向低溢價窩輪埋手，雖然攞唔到爆炸力嘅着數，賺錢之時唔夠刺激，但穩陣。
中銀C輪4644：中銀（2388）派成績表後低見15.40元，近日個勢醒番，爬爬吓升越16元，昨收16.15元，升10仙。最近最猛嘅銀行股係交行（3328），兩個幾月前以2.50元招股，𠵱家3.45元，高過招股價38%。呢段時間中銀只係升得4%。交行嘅業務地區係國內，中銀喺本港，國內生意只佔少少，兩隻股票唔適宜拉埋嚟比拼。不過，兩隻股票都係紅色背景，中銀仍然可以炒落後。
揀穩陣嘅中銀C輪炒，3641係其一，4644係另1隻。隻輪溢價唔夠1%，有5個幾月壽命，數據吸引。搏殺格，則揀下月尾到期嘅4760，呢隻輪短時間內郁1成，閒過立秋。
章盛