星期日，老公買咗兩張慈善券，諗住入迪士尼幫囡囡慶祝滿三個月大，點知換嚟一肚氣。天公不作美已經大殺風景，入到去淨係排隊玩遊戲、影相、買嘢食、去廁所都等餐飽，原本諗住搵米奇美妮同阿囡影張合照留念啦，最後都係攰得滯頂唔順，求其喺精品店買隻公仔陪佢瞓算數，激氣！
返到屋企又肚餓又攰，不過當然要餵咗阿女先啦！阿囡唔知係咪太肚餓，食得鬼死咁急，餵完奶，跟手我就走去煮飯。老公就走去同囡囡玩，將佢升高降低係咁拋，阿囡笑到𠺝𠺝聲，重開心過去迪士尼，結果老公就自招惡果，囡囡噴到佢一面都係奶。
鬼咩，第一佢飲奶太急，吮奶同時吸入太多空氣，搞到嘔奶都唔奇。所以點解每次餵奶之後要掃風，就係等BB打嗝將空氣排出。第二，食完奶後盡量避免同BB玩埋啲咁激烈嘅遊戲，咁搞法只會令到佢個胃不適而噴奶，我笑佢梗係肚餓得滯，想同囡囡爭奶食啦！（四）