鄭秀文（Sammi）前晚不施脂粉出發往威尼斯影展，對得影后與否不予期望。對於被李英愛認錯是楊千嬅，Sammi謙虛地表示「佢靚啲」，至於許志安和韓紅激吻一事，Sammi笑言：「你哋聽完呢單嘢都笑啦。」 記者何永寧、仇志德威尼斯直擊
電影《長恨歌》大隊前晚乘坐法國航空班機出發去威尼斯影展，導演關錦鵬表示以輕鬆心態參賽，他讚鄭秀文演得好，謂「冇人可以同佢比」。對於李英愛將楊千嬅誤當作Sammi，吳彥祖說：「佢哋風格唔同，我同千嬅合作過三次，佢鍾意搞笑，Sammi就係今次拍戲先識，佢係好認真嘅演員，我欣賞佢為套戲成年唔做其他工作，我亦睇好佢攞影后。」
「唔抱大期望」
五分鐘後Sammi在fans簇擁下到達，素面示人的她一度以fans送的相簿遮面，並說：「早知咁多人，就畫靚條眉先嚟啦。」問到可有信心攞影后，Sammi說：「冇呀，心情好輕鬆，我當係去一個免費trip。」
記者指Sammi是影后大熱，她說：「你哋自己寫啫。」當得知是威尼斯方面報道時，她說：「係咩？唔知喎，我唔抱咁大期望。我套套都表現佳喎，唔係因為呢套係藝術片而唔同，笑片我都好認真去拍。」
讚千嬅靚啲
至於被李英愛誤以為她是千嬅，Sammi說：「佢靚啲。」問到可有看過許志安和韓紅激吻的新聞，Sammi以「嘻嘻」作回答，並說：「你哋聽完呢單嘢都笑啦。」那安仔可有致電向她解釋，Sammi說：「今日唔講呢啲嘢。」
此外，鄭秀文（Sammi）與吳彥祖等於昨晚六時許抵威尼斯機場，吳彥祖認真倒楣，落機後領取行李時，始發現其中一箱行李遺失了。他在當地機場向傳媒表示：「航空公司話件行李寄失咗，要等航空公司運番嚟，好彩禮服我係跟身嘅，唔見咗嘅行李只係裝住底衫同內褲。」
Sammi下機後，有歌迷接機，其中一位歌迷更送上一把雨傘給她。Sammi謂：「威尼斯景色好靚，有時間去參觀啦！」
