太極將於本月在紅館舉行二十周年演唱會，七成員大部份都已成家立室，他們的聚會已不再只是夾band，就如家庭聚會般，故七子對開演唱會一點也不感到緊張，只有興奮的心情。
太極不知不覺已組成了二十一個年頭，今年他們將會在紅館舉行二十周年演唱會，太極七子的心情都非常興奮，雖然雷有曜要到演唱會前一星期才由加拿大回港，但其餘六子一點也不擔心準備不足，雷有輝說：「我哋一埋牙就嘭嘭聲，都夾咗咁多年，所以一啲都唔擔心。」
拗撬無損兄弟情
談到同期出道的組合草蜢亦即將舉行演唱會，怕不怕比較？太極說：「唔怕，咁咪好囉，大家都係八十年代，一齊開演唱會幾開心呀，我哋都唔同類型，所以都唔怕比較嘅。」
二十年後再次重聚開演唱會，究竟感覺如何？太極說：「真係好難得，識咗二十年喎，我哋個個都差唔多成家立室，間唔中都有聚會，已經變咗係家庭聚會，好熱鬧。」二十年來太極間中都會有拗撬，但從沒傷害他們兄弟間的感情，他們說：「冇鬧交就假嘅，不過我哋每次都係針對事，唔係對人，所以好快就冇事。」
樂隊發展空間少
對於近年樂壇愈來愈少樂隊，太極說：「其實同唱片公司都有關，講真𠵱家賣碟真係賣唔到幾多錢，所以唱片公司要做埋歌手嘅經理人，幫佢哋接其他工作賺錢，又要有樣又唱得，真係好難，𠵱家係多咗人學樂器，但機會就少咗。」
採訪、攝影：胡比
