港股繼續在高位整固，一反上日的大幅波動表現，恒指高開後，只在65點的窄幅內上落，收市15224，升63點，成交165億元，期指收報15228，輕微高水4點。
大市表現一如預期，後市令人有少許戒心的，就係在月底會有大量C輪到期，大戶極有可能要㩒住或造低個市計價，所以，大市短期係冇大升嘅條件，能夠在窄幅內橫行作為整固，已經係上上大吉，低位支持暫時係14800。
網上遊戲熱潮吹到香港，繼亞太投資（603）後，已停牌的時富金融（8122）亦傳出會同內地的大科網公司合作發展網上遊戲，並會以股票支付有關收購費用。時富金融停牌前，股價亦大幅上升。
噚日推介嘅TOM在線（8282），收1.42元，跌2仙，全日見有大行沽盤力壓，睇嚟係唔畀佢升，幕後有何打算，局外人估唔到，但講到家吓互聯網同網上遊戲熱潮之下，TOM在線係寶，唔係草，被發掘出嚟，亦只爭遲早，只要大戶一鬆手，升破1.49元嘅阻力，就會揚長而上。
嘉國預期升幅達3成
濠賭股升浪有再起之勢，噚日以英皇娛樂（296）同嘉華國際（173）最出色，前者收2.475元，升4.2%；後者收2.85元，升3.6%；至於嘉華建材（027），最高5.95元，收5.8元，升1個位。
嘉華系兩股嘅走勢，都係形成咗一個大型底部，再破位而上，升幅將會好可觀。睇好濠賭股，嘉華孖寶可追進。
先講嘉建，由今年5月開始，走勢形成一個大型嘅複式頭肩底，上月底升破頸線阻力並出現後抽，只要升破6元，上升目標指向8元，預期升幅有38%。
嘉國形成嘅底部亦係由5月開始，不過就係一個大圓底，頸線在2.95元，升破後嘅量度上升目標係3.75元，預期升幅有31.5%。
嘉建將會易名銀河娛樂，未來5年會投資57億元，分別在澳門市中心同路氹區大規模發展4個項目，明年底之前會有3個新賭場落成，在07年澳門賭場落成的高峯期前，爭取更大的市場佔有率，目標係08年所佔市場份額達35%，每年收益將以10億元計。
郭兆誠