擁有35C上圍嘅岑寶兒（阿夢）同圈外男友嘅感情發展可謂如膠似漆，噚日凌晨佢同男友拍拖去中環隊酒，其間兩口子拖手搭膊頭漫步，阿夢除咗俾男友三度咀嘴之餘，重一齊返屋企過夜㖭。
噚晚凌晨十二點幾，阿夢戴住cap帽、着T恤同板仔褲，同一樣以一身便裝打扮嘅四眼男友煙韌夜遊，當時佢哋十指緊扣喺中環蘇豪區一帶出現，男友一時搭住阿夢膊頭，一時又啜吓女友臉頰，好鬼恩愛。
攤喺椅咬耳仔
阿夢同男友之後入咗一間酒吧消遣，現場見阿夢點咗一杯紅酒，男友就一邊煲煙一邊飲黑啤，兩個人攤喺椅上喁喁細語，男友又趁機再咀阿夢頸側，搞到佢即刻冧笑。大約過咗個零鐘頭後，呢對小情人隊完酒，埋單後就帶住幾分酒意去咗附近便利店購物，繼而拖手漫步返屋企，喺步行途中，男友忍唔住再啜阿夢塊面，最後至一齊行入士丹利街嘅一幢大廈共度春宵。
