股價冇厘頭升咗好耐嘅東方工業（353），噚日突然玩插水，勁跌55.6％。
隻股場面咁駭人，江湖自然傳聞四起，其中講得最多就係炒家水緊，但同時亦有人講，隻股雖然話就話控股權易咗手，但實際上重有好多交接工夫未搞掂，新舊大股東仍然要有好多問題要解決，噚日股價突然插水，可能與此有關云云。
姑勿論邊個消息至係真，但隻股在跌到落最低位的0.51元時，就湧出大批投機者出嚟博反彈，令隻股彈番上0.75元收市，成交股數高達5511萬股，金額5602萬元。
博反彈要睇真
查實東方工業家陣大股東嗰位，係有人喺上個月行使一批可換股票據而來，佢嗰批票據嘅換股價只不過係0.12元，所以就算噚日隻股插水場面好驚人，其實佢帳面重係賺緊大錢。
噚日博反彈嘅炒家，可能以為東方工業股價已跌到好平，但實情係唔係平，相信都唔使小初多講啦。總之，博反彈就要小心啲。
慕容小初