同老公仔新婚不久，新開展的二人世界真係開心又甜蜜！我哋一得閒就玩煮飯仔，而新居嘅廚房，所有廚具都經過精心挑選，好多重係最新最有特色嘅設計。想知係咩廚具？跟我入廚房睇睇。
記者：陳家珍 攝影：陳偉強
Models：WarrenLau、JoeyYau
最「好玩」廚具：磁性隔熱墊
呢個隔熱墊唔止用得重玩得。煮完一煲熱辣辣嘅湯，要由廚房搬去餐枱，隔熱墊會吸喺鍋底跟住走，唔使老公仔行多一轉入廚房拎。隔熱墊用矽橡膠質製造，底部有磁性，喺瑞典拎咗RedDotAward2005㗎。另外，又可以貼喺雪櫃當裝飾。上次食完飯執枱時「飛」個隔熱墊去雪櫃，即刻黐實，幾方便，好似掟飛碟咁好玩！
售價：$49.9（a）
最方便廚具：隔渣連蓋鍋
呢隻容量五公升嘅連蓋鍋，鍋蓋附有勾扣，反轉都唔會跌落嚟。鍋身由鋁質製造，加上表面易潔塗層，清洗方便，食物亦唔容易黐底。下次老公仔煮意粉就方便喇，煮完意粉嘅水一次過倒落鋅盤，唔使再將意粉夾上碟先倒水咁麻煩！
售價：$179.9（a）
新婚送禮首選：雙囍組合
呢套紅噹噹嘅雙囍廚具組合，包括杯墊、杯蓋、筷子同製冰器，都係朋友送畀我哋嘅新婚賀禮。每次見到都提醒我哋甜到漏嘅新婚生活。前日我將西瓜汁放落雙囍製冰器整「囍」字西瓜冰食，幾開心！
榨果汁一條龍
榨完果汁之後要另外倒落杯飲，好唔方便啫。升學有一條龍，榨果汁亦都有一條龍──同一個樽，樽口可以配合榨汁器、漏斗或普通樽蓋。榨汁時配上榨汁器，果汁隨之流落樽內，換上普通樽蓋放入雪櫃存放，飲用時可以換上漏斗樽蓋倒出。
售價：$79.9（a）
轉到暈食物去水器
整沙律，啲水果抹唔乾水，落沙律醬之後就水汪汪。幸好有呢個去水器，佢內層係筲箕，只要合上蓋一拉繩，個筲箕就會極速旋轉。根據向心力學原理，在水果身上嘅水就會經筲箕「fing」晒出嚟，聚落膠筒底部。
售價：$130（b）
慳力麵包刀
呢把麵包刀係根據人體工學設計而成，刀身呈鋸狀，依照人手拎刀時最舒服嘅手勢製造，令你切得慳水慳力，舒服方便得多。
售價：$59.9（a）
a）IKEA宜家傢俬
地址：九龍灣德福廣場第二期3樓（31911188）
b）G.O.D.住好啲
地址：銅鑼灣霎東街禮頓中心二樓（28905555）