大市噚日極度波動，早段升過79點，午後又大跌近190點，但低位承接力都幾強，尾段反彈，恒指收15160，跌67點，成交上番183億元，期指平水。
港股暫時離唔開上落市格局，前日在64點內窄幅上落，噚日就大上大落（高低位相差成270點），基本上係在14800至15300之間整固。9月底大量窩輪到期，有可能令到整固期拖長，而發行商為要賺到盡，唔排除會推低個市，但即使14800真係篤穿咗，14600嘅支持力都應該經得起考驗。
大市調整，個別股票仍然好有鑊氣，噚日上升股（唔計認股證）重有成260隻，市況好大機會走向個別發展。升得最勁而又有大成交支持嘅，係前日復牌嘅日本亞太事業（603），前日升近1倍後，噚日再高收16.9仙，再升49.5%，排第5位，成交接近10億股，總值1.5億元，真係賓虛咁嘅場面。
日本亞太咁勁，主要係注入網上遊戲業務，過去大半年，在歐美同日韓嘅股市，網上遊戲呢一瓣好受歡迎，有關公司嘅股價，升幅多以倍計，家吓熱潮吹到嚟香港，相信炒風會持續一段長時間。
預測PE僅18倍
TOM在線（8282）同互聯網通訊公司Skype在中國成立合資公司，佔51%權益，專責中國市場的研發，制訂簡體中文版本的Skype軟件和服務，並向內地互聯網用戶及服務供應商分銷。
TOM在線擁有互聯網入門網站同全國性推廣及分銷渠道，今年完成收購印度無線遊戲開發商Indiagames，並推出網絡休閒遊戲服務，若此方面業務有進一步的發展，不難會成為「網遊股」熱潮下的尋金對象，家吓趁股價未郁之時，不妨望多兩眼。
TOM在線有業績支持，05年（12月年結）全年預測盈利約3.3億元，每股盈利8仙，預測PE只係18倍，重係好吸引。
過去9個月，TOM在線股價嘅走勢成個大圓底，呢個係典型嘅收集形態，只要升破1.49元嘅頸線阻力，而又有大成交支持，量度上升目標係1.90元。
郭兆誠