呢兩日二三線股炒風又起，其中日本亞太事業（603）發新股收購韓國網上遊戲後，連續炒咗兩日，昨日再升49.55％，收0.169元，成交金額更暴升至1.5億元。
查實網上遊戲之前都有上市公司搞過，但消息未能令股價炒高，可能係同個game好唔好玩有關。今次日本亞太雖然炒高，但有乜嘢game玩暫時仍未太清楚，見佢炒得咁厲害，唔知可唔可以帶領網上遊戲成為另一個炒作概念呢？
中科環保傳好事近
另外，一直只見身郁唔見米白嘅中科環保（351），昨日終於見到多少突破，升8％，收0.81元，成交股數增加至2522萬股，金額2000萬元。經紀陳話收到料，公司好似有收購合併交易要進行，聽講係為旗下項目引入投資者之類。
中科環保早排股價一度急挫，原因係名字相近的中國環保電力（290）令外界以為中科環保引入中國電力（2380）為投資者一事泡湯，事後發現唔係咁，股價當堂升番。
慕容小初