向來愛車如命嘅郭富城，日前約埋死黨沈嘉偉，去咗跑馬地嘅彭慶記酒家消夜。當晚兩個大男人又喺街頭舉行名車展，沈嘉偉揸住佢部保時捷跑車到場，城城重勁，出動落地五個月、車價高達三百八十萬嘅銀炭色Murcielago林寶堅尼跑車，加上一身至潮黑look，型男配名車，自然吸引唔少途人投以注目禮。
兜圈避差人
當晚十點零鐘，沈嘉偉揸住架波子跑車，率先抵達酒家門外。冇耐城城亦揸住佢架林寶堅尼到場。點知咁啱遇上交通警員趕車，所以兩位男士駛開部靚車，兜咗個圈至折返現場。
點知原來警員重未撤退，其中一名交通警重行去城城架車旁邊，睇一睇貼喺擋風玻璃上嘅行車證，再繞車行咗一圈，之後再遞咗本簿畀城城。事後問城城係咪被抄牌？佢笑騎騎咁話：「唔係，佢嗌我簽名之嘛！」