恒指埋單跌67點，好似相當和平，但全日高低波幅達269點，早段升過79點，最慘情之時散過189點，過程令炒輪者心情如同天氣變化。
攞中石化C輪3905做樣辦，正股（386）高低相差0.10元，收3.525元，升1格。3905前日17.6仙，昨日最高18.8仙（升7%），最低12.1仙（散31%），收15仙（跌15%）。隔晚揸貨幾傷吓，即日低位撈貨者大賺24%。隻輪唔係冷門貨，成交金額有13球。
3905喺咁嘅波動中，有如喺大海中，有人葬身魚腹，有人釣到大魚，亦說明𠵱家賭輪，注碼要有分寸。賭得過狼，睇錯方向，又或者運氣差啲，好易艇反人亡。
平保C輪3827：平保（2318）係彈力最勁嘅國內保險股，最低13.15元，高收13.40元，升20仙。平保有芬佬盤護航，稍為跌多啲，就有勁盤露面撐住。吼每次回落，買啲C輪。
平保C輪正路之選，係3827，明年6月中到期，輪價18.4仙，溢價5.4%，槓桿率7.3倍（有效5.3倍），引伸波幅23.7%。咁嘅數據，當然唔算爆炸，不過炒家萬一睇錯正股，亦唔致於血壓大升。
章盛