張栢芝年初曾到印尼棉蘭探訪南亞海嘯災民，當時她承諾為一名腦部長腫瘤的女嬰支付手術費用，其後手術費由當地政府全數支付，但女嬰的雙親仍希望栢芝額外捐助善款；栢芝昨日表示除非善款確實能幫助該名女嬰，否則不希望自己的愛心被人濫用，現時對捐款一事有所保留。
去年底南亞發生海嘯後，張栢芝和張衞健於今年一月初帶備大量物資，齊到印尼棉蘭巿探訪災民，探訪期間，栢芝發現一名女嬰腦後長了一個網球般大的腫瘤，但其母親表示因為沒錢，所以未能讓女兒接受割除手術，栢芝除承諾支付所有手術費用外，又即時把身上的現金贈予對方，並囑咐女嬰父母盡快安排她進行手術。
助建家園
中間人私下捐千元
其後女嬰在「蘇北印尼留台學會」會長劉其俊協助下，於當地的政府醫院成功進行割除腫瘤手術。日前劉其俊來港探親，還特地帶同女嬰的最新照片和近況資料，準備交予栢芝，但因栢芝目前不在香港，彼此聯絡不上。
劉其俊日前在銅鑼灣接受訪問時說：「當日栢芝對嗰位女嬰好有心，佢重口口聲聲話要支付手術費，不過後來女嬰入住政府嘅AdamMalik醫院，政府幫啲災民支付晒所有費用，女嬰割咗個瘤之後，身體復原得好快。不過女嬰嘅父母因為記得栢芝嗰日答應過要幫助佢哋，所以成日問我可唔可以聯絡栢芝捐啲錢，但因為聯絡唔到，我已經私下捐咗約一千多港元畀佢哋重建家園。」
劉其俊又大力讚揚栢芝上次親到災區探訪災民的行動，他說：「佢呢份善心係值得讚賞，至於我今次拎啲相嚟，係想畀栢芝睇吓呢個女嬰嘅近況，並唔係一定要勉強佢再捐錢，捐唔捐係一份心意，冇所謂嘅。」在劉其俊出示的照片中，可見女嬰手術的傷口已完全癒合，其中有一張由母親抱着她的照片，可見女嬰的樣子十分精靈可愛。
樂意捐輸
信任體制完善機構
就捐助女嬰事件，栢芝昨日透過經理人李小姐在電話中回應說：「栢芝當初為南亞地區嘅海嘯災民，去咗印尼做探訪，當時栢芝見到醫院嘅小朋友咁可憐，係答應幫佢畀醫藥費，但因為院方答應免費醫佢，所以佢嘅家人根本唔使畀任何費用，當時院方已通知我哋唔使畀錢，但佢嘅家人係咁問我哋攞錢，栢芝覺得好奇怪。」
李小姐又指栢芝對小朋友十分有愛心，亦不介意捐錢幫助此名印尼小童，但她希望可以透過一個具完善體制、關心善款流向的慈善機構捐款，李小姐說：「栢芝話唔想藝人愛心俾人濫用，如果捐出嚟嘅錢唔係實際幫到個小朋友，佢對今次捐錢係好有保留。」
採訪、攝影：比華利、陳月媚
