美聯聽日公布業績，對手中原噚日率先報數，上半年營業額十九億一千四百萬，一年增近三成九，稅前盈利三億一千四百萬，增三成三。
中原集團主席施永青話，升幅喺預期之內，下半年冇咁樂觀，料僅十五六億。
施老闆話，其實樓價經過首季急升，次季放慢，七八月暫時重係全年最差。
以往嚟自一手嘅收入佔四五成，今年上半年得番兩成，下半年難以樂觀，因為少新盤，發展商惜售兼要價高。另外，盈利增長最快嘅中國部，因為宏調，上海、南京等城市物業價量急跌，對中原盈利都有影響。
佢補充，上半年條數，稅前盈利增幅唔夠營業額多，反映支出增加快過收入。
不過，施老闆又唔會好悲觀，因為七月係今年樓市嘅低位，即係最差嘅日子已成過去。
電郵地址：[email protected]