雖然阿爸開到口叫自己返屋企幫手打理家族生意，但財政司司長唐英年依然一意從公，努力為特區人民服務；煲呔曾有個咁進取嘅拍檔，一啲都唔似吳光正，真係唔知開心抑或擔心好。
唐唐前日見完迪士尼班大老鼠，檢討過禮拜日嘅樂園小蝦碌事件後，噚日飛咗去南韓濟州島，出席第十二屆亞太經濟合作組織財長會議，同班汶萊、秘魯財長領略韓風。今年個會嘅主題係「自由及穩定的資金流動」同「人口老化為經濟帶來的挑戰」，香港不時被國際資金當提款機，老人院又成日出事，呢兩個題材應該考唔起司長，當然，呢亭口水會議唔會有乜結果，talk吓就算；咁唐唐食完泡菜咪禮拜五趕返嚟做正經事──接待曾慶紅副主席，為迪士尼開檔做大騷。而唐唐離港期間，就由葉澍堃兼任財政司司長。
除咗去南韓去迪士尼，司長其實重有重要嘢做，就係財政預算案，明年個預算案提早喺二月公布，時間當然緊迫些少，所以唐唐已經開始四出放風兼收風，以便第日閉門做靚盤數，睇吓有冇機會減多少稅爭取民心，或者派多啲錢畀各部門使。當然呢個世界冇不勞而獲，各部門頭頭如果想搶多啲資源，一定要落足嘴頭先至得。
無法甩身講啲嘢解圍
講番唐爸爸，自從董建華忽然腳痛，北京又忽然轉風，畀煲呔冷手執個熱煎堆之後，腳頭雖好嘅唐唐，仕途蒙上陰影，佢唔係話完全冇機會，但就肯定冇江朱時代咁一片光明啦，所以有人傳話唐家好冇癮，最失望當然係唐爸爸同唐媽媽，有一日，重出咗一則唐爸爸叫個仔返屋企幫手嘅大新聞。
八方問唐唐呢條新聞有幾堅？佢哈哈哈乾笑幾聲之後，就話梗係冇呢回事啦，只不過當日佢阿爸俾班記者圍住，八十幾歲老人家無法甩身，惟有講啲嘢解圍。唐唐重好奇怪咁問點解有人聽得明佢阿爸講嘅無錫話。原來，當日有人喺旁邊做繙譯，邊個？咪唐媽媽囉。唔怪得啦，可能唐老先生只係叫班記者夠鐘返屋企幫阿媽煮飯，但一經唐媽媽繙譯，變咗叫唐唐返屋企幫手。
天下慈母，見個仔俾人蝦，係阿媽都唔捨得，咪不如叫佢返去打理自己盤生意好過。不過，八方覺得唐媽媽唔使咁早棄權喎，反正清潔大隊長都有得翻身，係咪？
爆料熱線：29290000、27860099
報料傳真：26239278
報料電郵：[email protected]