天水圍滅門慘劇揭示政府部門未能協助受虐者解困，阿雲和阿玲也曾遭到虐待而向當局求助，她們以過來人身份，昨日控訴社署及警方漠視她們的需要，阿玲更強調「好嬲社署」！
阿雲：淨係落口供
阿雲與丈夫結婚十年，過去六、七年一直忍受丈夫經常拳打腳踢的對待。她昨日哭訴：「試過一次丈夫飲醉酒瞓咗覺，我冇叫佢起身買馬，佢瞓醒就打我。如果當時我還手，就肯定死硬！」
她又嗚咽道：「咁多年受虐都試過報警，但報咗警，淨係落口供，警察都幫唔到我。諗到都係要返屋企，行到屋企門口出面嘅走廊都已經有陰影，覺得好驚！」她向和諧之家求助，現已與丈夫分居一年多。
阿玲：擔心失去BB
另一位受到精神虐待的阿玲，昨致電商台節目《在晴朗的一天出發》，控訴十多年前她懷孕後被男友拋棄，到社署求助，但該署無視她的困境。她說：「當時去咗『母親的抉擇』，後被轉介社署，社署認為我情緒有問題，要我睇精神科，但我冇睇，因為擔心會冇咗個BB。社署根本冇跟進到，冇關心過我有冇飯食，有冇屋住！」回想社署的對待，她至今仍心有不忿。
本報記者