講開又講，其實老公Donald都係一個好爸爸，半夜三更阿女一喊，佢第一時間仆去抱佢。醫生都話，如果老公可以減輕老婆嘅湊BB壓力，老婆患產後抑鬱症嘅機會會降低。
產後第一日返工，就因為人奶而令我瘀爆。喺會議進行途中，突然覺得胸前濕濕哋唔多妥，即刻衝入廁所睇吓發生咩事，原來係漏奶，搵廁紙左抹右抹都搞唔掂。Janet見我入咗廁所咁耐就走嚟睇吓我，佢知道情況後就話，如果BB四個鐘頭食一次奶，漏奶情況亦會四個鐘出現一次，所以最好買定即棄乳墊嚟吸濕，重有另一個方法，就係交叉雙手按住個乳頭15分鐘就可以停止漏奶。
試過呢個方法，真係停咗冇再漏，我就同Janet講，早知唔餵好過餵啦！但佢又話，其實唔餵哺人奶，谷住晒亦好易會引起乳腺炎。𠵱家先至知道母愛原來好偉大！（三）