港股噚日午後又再次失驚無神大跌。Cookie話應該又係窩輪作怪，港股本身冇乜方向，上午恒指上試15300無功，下午見日股轉升為跌，期指大戶即刻出手插低港股，衍生工具發行商跟住沽貨。幸而大市好快就回穩，全日收報15160，跌67點，成交達183.79億元。
中國神華（1088）有多間發行商宣布發行備兌證，合共19隻。阿虎班朋友話，大家咁高興齊齊發神華輪，但點解唔見有關發行商傳真張termsheet推介一番呢？黑客話，原來班發行商嘅玩法已經唔同咗，以前向聯交所攞到Quota後，就即刻出termsheet畀經紀行向散戶推介，現在連推介都費事，熱門輪易去貨，上市當日直接在市場上賣出街都冇難度。
19隻神華輪將於下周二掛牌，發行商需要吸納足夠數量的股份以作對沖，相信神華短期走勢一定好。神華噚日逆市升2.26%至9.05元。神華以7.50元招股，上市後在7.40元水平浮沉，在街貨收集得七七八八後，最高曾炒上9.30元。
太航隨時有沽壓
太平洋航運（2343）業績好兼派高息，股價全日勁升7.14%至4.125元。公司估計全年派息不少於0.60元，即股息率達14.5%，咁高息重可以去邊度搵？一波立即將其目標價由4.50元調高至5.30元，但同時警告該公司有2.94億股1年禁售期已屆滿，隨時可在市場沽售，成為不明朗因素。不過呢批股份市值僅12.127億元，市場應該可以承受得到。
時富金融（8122）下午3:24分中途停牌，原來計劃配股。配股前股價大升72.41%至0.50元，成交503萬元，唔通又有強者入股？
阿虎