所謂上有好者，下有甚焉，大家都知道煲呔曾鍾意養錦鯉，呢股養魚風氣，估唔到吹埋去迪士尼隔籬間消防局。八方噚日參觀竹篙灣消防局，見到局內嘅天井，竟然有個幾大嘅人工魚池，魚池之內當然有養當奴最鍾意嘅錦鯉，至於個魚池嘅建造費，就睇怕唔使三十萬嘅。
八方諗唔到魚池同救火救人嘅工作有乜關係，帶隊參觀嘅新界西南指揮官羅錦榮解釋話，呢個魚池不過係整個建築設計嘅一部份，主要係為配合樂園嘅園林式設計，同風水冇關，但係消防員食飯時透過飯堂塊玻璃望出去天井，遙望錦鯉，陶冶性情喎。
至於魚池旁邊嘅植物有專人打理，餵魚嘅責任就交咗畀當值消防員。
八方覺得佢講得幾有道理，不如差館、海關、入境處、甚至政府總部都掘個窿，放吓水養吓魚囉。
爆料熱線：29290000、27860099
報料傳真：26239278
報料電郵：[email protected]