譚詠麟前晚尾場個唱，請來徐小鳳任嘉賓，二人扮韓劇苦情情侶，阿倫揹着小鳳姐唱歌，後來志偉上台時揶揄阿倫連幾頭家都孭得起，被阿倫報仇指他永垂不舉，笑爆全場。
譚詠麟前晚在紅館演出尾場「譚詠麟歌者戀歌濃情三十年演唱會」，曾志偉、陳百祥與黃杏秀、鍾鎮濤與范姜及女兒鍾嘉湄、彭健新及陳友等都有捧場，阿倫更邀得徐小鳳任表演嘉賓。
小鳳姐與阿倫合唱後，互笠高帽一番。其後小鳳姐竟在阿倫面前公然拉bra帶，又拒絕讓阿倫拖手，惹得全場大笑。
咕𠱸墊背免貼身
小鳳姐表示她看韓劇《藍色生死戀》，總看到哥哥揹着妹妹在沙灘行，故要求阿倫揹她，全場嘩然，小鳳姐又不停以雞仔聲叫阿倫作哥哥，阿倫忍不住笑說：「唔好以為你叫鳳就咁叫啦。」阿倫並擺出欲揹她的姿勢，小鳳姐謂不想近距離接觸，於是有工作人員拿出波波咕𠱸墊在阿倫背上，小鳳姐即跳上阿倫身上，只見阿倫樣子痛苦，滿臉通紅的說：「行唔到呀，我會盡量支持住，風雨同路。」小鳳姐則笑謂：「唔得出聲，唔好夾硬嚟，跌死我㗎。」阿倫遂唱半首《忘不了你》，小鳳姐還扮韓國女角重病咳嗽，阿倫配合說：「哥哥好辛苦呀，我𠵱家知點解啲哥哥成日喊。」相當搞笑。
溫拿明年開個唱
到安哥部份，阿倫請志偉及阿叻上台一同唱歌，阿叻叫阿倫也揹志偉唱歌，志偉說：「唔好考佢呀，佢幾頭家都孭得起㗎。」笑爆全場，阿倫作狀踢他，阿叻即謂：「你想喺紅館做完，過隔籬館做堂倌呀？呢啲都噏？」志偉即說：「紅館、萬國、世界都好啦，我聽講今日紅館好冷場，我咪着件褸嚟囉，點知咁熱鬧，我收錯風。」阿倫即報仇道：「夠話你永垂不舉啦。」
阿倫事後謂沒有嬲志偉，他說：「我真係好重負擔，要養幾十個宮女。」隨即指着助手大笑。有人提議阿倫與小鳳姐合辦演唱會，他說：「叫鳳毛麟角囉，但主辦商孭唔起，好貴㗎。」阿倫與阿Ｂ等又表示計劃明年舉行溫拿演唱會。
此外，阿倫邀請經理人張國忠上台，他答謝對方時眼濕濕，場面感人，黃伊汶最後上台唱歌時答謝阿倫，亦幾乎落淚。而余文樂前晚特地往紅館看黃伊汶演出，然後即走，事後黃伊汶說：「冇可能，佢太畀面，多謝畀面。」
採訪：蔡如玉
攝影：陳志嵐
