世紀21西環開分行
政府對地鐵興建西環支線開綠燈,市場人士都認為,未來西區樓價可以看高一線,世紀21已落實,喺西環卑路乍街租舖開分行,今個月開張,有十一個員工。世紀21薄扶林分行高級經理陳展文話,會集中做住宅。
代理業大家鬥開分行,究竟點樣解決人手問題呢?世紀21行政總裁吳啟民就話,佢哋𠵱家經常搞招聘會請人,對有潛質嘅前線,重會大力培訓㖭。
講開培訓,地監局強調,要代理業界參加持續專業進修,兩大代理集團都推出可以攞學分嘅課程。中原地產培訓及人力發展部高級經理吳治國話,佢哋推出兩個課程,包括「有效管理地產代理業務及監察機制」及「如何建立良好客戶關係」,每課程有三個學分。
今次推出嘅兩個課程,費用全免,重由中原地產聯席董事鄧意民,以及吳治國主講,用實際行動鼓勵同支持積極進修,裝備自己。