劉德華早前在鄭州演唱時，抽空到武林勝地少林寺參觀，並親睹少林弟子的鐵頭功表演，令他歎為觀止。華仔當日還買下少林寺的功夫背心，並即時穿上拍照。
劉德華最近展開其內地巡迴演唱會第二部份，至今他已到了西安、鄭州和無錫三地演出，華仔在鄭州演出時，趁機到少林寺參觀，並欣賞了名不虛傳的少林武術。
華仔在西安一站中雖無閒參觀兵馬俑，但在鄭州時就到武林勝地少林寺參觀，當日清晨出發的華仔，在少林寺一睹少林弟子的武術表演，他尤其欣賞鐵頭功，華仔說：「唔單止鐵頭功係用頭，佢哋連打觔斗都係用頭嚟打，好厲害。可惜當日見唔到金剛腿，唔知佢係咪休息，定係去咗拍戲，去到嗰日佢冇表演。」
自嘲骨頭硬化
問華仔可有興趣到少林寺拜師學藝？他笑說：「邊有時間？而且學武係最好從小開始，骨骼柔軟啲，我已經骨頭硬化，上次拍《十面埋伏》時，張藝謀派個武功師傅嚟教我，幫我拉筋時痛到我大叫，重差啲喊咗出嚟，雖然我𠵱家日日都有做拉筋，但點練都唔及少林嘅小朋友筋骨咁鬆軟，我連一字馬都做唔到，練好跳舞，我反而重有少少信心。」
參觀少林寺後，華仔又買了一件少林功夫的背心，並即時換上，又在少林寺前拍照留念。觀光完畢，華仔就返回演唱會場地繼續綵排，華仔更即時穿着該背心。
晚上演唱會時，以《大隻佬》造型現身的華仔，又穿上該背心出場，現場觀眾見華仔化身少林武僧，即時嘩聲四起，他說：「嚟到鄭州要入鄉隨俗，我特別買咗呢件服裝着嚟畀大家睇。」
歌迷趁亂進場
此外，華仔的內地巡迴演出多次出現炒黃牛票情況，亦有歌迷以不同方法偷偷進場，工作人員事後估計，無錫個唱全場最少迫進九萬至十萬人。華仔在無錫親睹近五百人衝進場館後台，一片混亂，後來大批公安及武警趕到，華仔說：「歌迷買唔到飛，用盡方法入場，我可以體諒，佢哋都係想睇我，不過安全好緊要。」
