問人邊度有蘇豪式餐廳，大部份人會答你去中環啦，有人會答你尖沙嘴都有，有冇諗過係新界區都搵到？荃灣的悅來酒店（即熊貓酒店）近日大翻新，樓下商場開了三間蘇豪式餐廳。當中最具噱頭的是BeiraRio的菜式名字，甚麼比薩斜塔、今晚蠔一蠔……乜話，重連麥兜都炸嚟食？
記者：梁學文
攝影：陳盛臣
Model：Cathy（TheGroup)
鯉景灣閒情搬來荃灣區
荃灣悅來酒店商場新開的三間蘇豪式餐廳，名字古怪，分別是BeiraRio、鳥at29和TVat30。BeiraRio是西餐廳，而鳥at29是日本菜，TVat30則是泰越菜。餐廳與鳥at29相連，採用半開放式設計，讓你享受歐陸式路邊茶座感覺。這類餐廳在荃灣區只此一家。望住街景，外面行人匆匆忙，你則慢慢歎美食，一個字：「爽！」。餐廳內的設計以簡單舒服為主，而兩層的設計則增加了店內的空間感。
BeiroRio菜名夠噱頭
如果你鍾意捐窿捐罅搵嘢食，可能都知道三間餐廳早在鯉景灣開辦，今次開辦分店，希望將鯉景灣優閒感覺搬到荃灣。在這裏，BeiraRio和鳥at29打通，讓客人可以食勻西式和日式美食。BeiraRio最噱頭係食物名，例如風脆麥兜千層，其實就係炸豬手切片！
海鮮拼盤$198
海鮮拼盤一共有八款海鮮，包括有海蟹、海蝦、扇貝、秘製汁東風螺、美國青口、小象拔蚌、法國海螺和新西蘭鮮蜆。除番開條數，即是每款海鮮都是廿零蚊，你話抵唔抵喇？
風脆麥兜千層$118
嘩！唔係吖話，食麥兜?!當然唔係咁殘忍啦，其實是炸德國鹹豬手。師傅先用十幾種材料做上湯，然後浸熟豬手，最後落鑊炸，然後切片叠（串）起上碟。豬手炸過後變得香脆，豬手皮更是甘香好食。豬手入口勁脆，豬手肉好腍身，令人想一食再食。
始創比薩斜塔$62
比薩斜塔，其實是將意大利雲吞串埋一齊，製成一個塔。上枱時就經已聞到好香香草味，聞到都流口水。意大利雲吞採用開面的做法，將雲吞攤開炸。這款雲吞最重火候、油的熱度控制。雲吞入口香口，咬落重有啖啖魚肉味。
今晚蠔一蠔$98/4隻
今晚豪一豪，究竟有幾豪？每隻蠔都是即叫即開，包保新鮮肥美。四隻生蠔中有兩隻是美國蠔BaldEagle，兩隻是澳洲蠔SmithPacific。美國蠔出名大隻肉質好，外形較小的澳洲蠔味道較鮮甜，蠔味十足。
BeiraRio（26120756）
荃灣荃華街3號悅來酒店商場地下28號
座位：40個
營業時間：11:00am-12:00mn
鳥at29主打壽司和食
鯉景灣的鳥at26是以鳥燒而聞名，不過新開的鳥at29就主打手握壽司同和食。鳥at29的總廚偉哥曾經在日本學廚，當廚師至今近15年，有相當的經驗。而他最拿手的是和食，南蠻雞就是他得意傑作。
七點盛$130
近排無淡水魚食，不過從日本來的海鮮大家大可放心。這兒每兩日海鮮就會新鮮運到，保證新鮮衞生。七點盛其實就是七種魚刺身，包括劍魚腩、章紅魚和生帶子等，新鮮甜美。
南蠻雞$25
南蠻其實是指用醋麥煮的菜，醋麥味道酸酸哋，最啱用來做前菜。師傅挑選肥美的黃油雞做炸雞塊，最後加入調校好的醬汁而成。黃油雞好有咬口，雞塊炸過甘香有咬口。
食客有Say
鳥at29（26120717）
荃灣荃華街3號悅來酒店商場地下29號
座位：40個
營業時間：11:00am-12:00mn
TVat30泰越混雙
TVat30中的TV，其實是指Thailand同Vietnam，即是說這兒是食泰越菜。這裏廚房的所有廚師都是來自泰國，包保食到正宗地道泰菜。除了食，TVat30還有兩間獨立K房，讓你食飽飯可以一展歌喉。
泰式拼盤$98/大
泰式拼盤有沙嗲串和泰式蝦餅等，由他們的泰國廚師精心炮製，做法正宗味道地道。拼盤最好味是蝦餅，外面香脆入面蝦肉彈牙。
蘇豪西擲界蒜茸包$22
用厚多士做蒜茸包層層叠高，好處是麵包夠厚身，外面烘完脆脆哋，入面重保持着軟綿綿口感。這款擲界蒜茸包即叫即烘，雖然製作需時，但就保持外脆內軟。除了淨食之外，還可以襯各款泰式咖喱。
TVat30（26120575）
荃灣荃華街3號悅來酒店商場地下30號
座位：120個
營業時間：11:00am-12:00mn