《達文西密碼》（TheDaVinciCode）呢本書已出版兩年，暢銷全世界，左丁山買咗本書一年，近日先至斷斷續續咁睇完，可謂落後於時代。左丁山係非教徒，冇讀過聖經，睇呢本書睇得幾辛苦，但又學到好多嘢，對西方宗教認識多咗好多。
天主教會對呢本書批評得好厲害，話作者DanBrown講大話兼誇張，歪曲歷史。不過歷史原來係「成者為王，敗者為寇」，歷史由勝利者寫成嘅，天主教勝利咗千幾年，教會歷史由梵蒂岡定奪，DanBrown之言，是否全不可信，好難講。左丁山買多兩本批駁DaVinci嘅書一齊睇，覺得DanBrown起碼做過大量資料搜集與研究，都唔知用去多少精神時間。外國作者有一個龐大市場，成功嘅話報酬極高，可成為億萬富豪，寫一本暢銷書可以食十年，用好多時間策劃一本新書，十分值得，可憐香港作家就冇法子如此唱慢板咯。
姑勿論此書是否符合歷史，其實本書幾悶吓，如果唔鍾意或冇耐性睇歷史猜謎遊戲，都唔知有乜好。左丁山抱住學習精神嚟睇，算係上西方文化通識教育課，學吓Λ代表男性，Ⅴ代表女性及其他符號之歷史根源，以及猶太解碼法（Atbash），就覺得好過癮，呢啲係香港課堂之內學唔到，平時睇書都冇嘅。
全書主題圍繞HolyGrail嚟發揮，左丁山呢類知識淺薄之人，完全唔知教會對HolyGrail嘅詮釋，只知道以前有一隻馬叫做HolyGrail，馬主係郭彰國，呢隻馬久唔久就爆冷。《達文西密碼》係一本智力考驗之書，作者將一個教會與神嘅概念寫到兩派鬥智鬥力，功力甚高，不過拍電影就難為了編劇導演，因為男女主角加一位SirLeighTeabing講完又講，搬上銀幕就會雙人三人長篇對話，想悶死觀眾咩。呢套戲上映之時，左丁山一定會去睇，睇吓人哋點樣將齋talk變成刺激電影。