煲呔上星期北上，除咗向中央攞着數，重請得大靠山曾慶紅南下，為米奇老鼠主題公園剪綵。八方聽聞，其實曾副主席自己都好想落嚟香港行走行走，睇吓呢個豆豉丁咁大地方嘅人乜嘢構造，點解咁難搞。
曾慶紅喺回歸一周年時，跟過江澤民來港，當時嘅身份雖然只係中共中央辦公室主任，但係已經權傾一時，風頭無兩。邊個想見老江，非得過佢嗰關不可。今次佢再南下，地位更尊貴，當然一定要顯示出皇恩浩蕩嘅派頭，等大家高呼萬歲。
所以貴人未到，好消息已經源源不絕。首先係提早公布六十位立法會議員包括所有頑童可以上珠三角兩日遊，呢個安排本來等佢嚟到先至講，𠵱家畀煲呔攞埋個彩，都冇所謂啦；其次就係叫煲呔廣發英雄帖，破天荒請晒六十個議員去星期日個大party，可惜立法會主席范太前日已經飛咗去美國放大假，接住去歐洲訪問考察，曾副主席駕臨都冇面畀！劉慧卿亦啱啱飛走咗，長毛同其他民主派就噚日收到請柬，席設港島香格里拉ballroom，時間係晚上六時，大家請早啲到喇，但最好就唔好帶橫額啦。
見議員 示威都唔驚
之不過曾慶紅出名長袖善舞，就算示威都一定唔會驚，何況佢重帶咗咁多禮物嚟，香港人咁現實，又點會為難呢個東方聖誕老人呢。嗱！香港最搞唔掂嘅基層就業問題，副主席大有可能會嚟幫下手，深圳市市長許宗衡都突然訪港，梗係有原因啦，唔係肥龍會笑得咁高興咩。
話說港深兩個特區，既係鄰居又係對手，畀面時稱兄道弟，唔妥時魚塘名單都唔畀你，所以話想搞乜嘢河套工業區，想開放多啲邊境關卡，方便人流物流，畀港人上去起香港村、老人屋，以至改善空氣，供菜供魚，總之乜都要傾，地方利益有時要勞動阿爺擺平。
曾副主席都好識做嘅，既然要深圳幫手，當然要去安撫吓情緒，反正佢哋今年慶祝特區成立二十五周年，中央未有高層出現。如無意外，曾副主席會先到深圳，然後周六下晝坐車過嚟香港，正式展開佢為期三日嘅香港親善之旅。CEPA、自由行、人民幣存款都畀咗，唔怕再畀多啲，雖然未到十二月，但大家都可以提早攞定隻聖誕襪嚟收禮物啦！
爆料熱線：29290000、27860099
報料傳真：26239278
報料電郵：[email protected]