老公Donald揀咗一間有露天茶座嘅意大利餐廳食CandlelightDinner。直覺話我知，男人突然變得咁細心，一定係不忠。見我疑惑嘅眼神，佢就話：「我見你呢排湊女咁辛苦，驚你有產後抑鬱症。而且我哋都好耐冇撐枱腳，囡囡咪交畀菲傭湊囉！」聽到佢咁講真係好感動，自從有BB開始，已經要節衣縮食，呢類高級餐廳都好少幫襯，𠵱家最鍾意行嬰兒用品店。
食完飯之後，就同老公去Shopping，見到個米奇老鼠奶嘴咁得意就想買個畀囡囡，但老公話怕佢吮奶嘴會令牙仔生得唔靚喎！吮得太耐梗係唔好啦，不過聽專家講，BB吮奶嘴可以增加佢哋嘅安全感，重可以減少喊同嘔奶機會。眼見Janet個女唔吮奶嘴吮手指，搞到手指公起枕咪重肉酸。聽見我咁講，佢就放心，重話要揀個有窿窿嘅，就算唔小心吞落肚，都唔會窒息喎！呢一刻真係覺得老公好細心，抵錫！（二）