傳統投資智慧話，最緊要識得喺壞消息入貨，再趁好消息出貨，話雖如此，相信冇乜人做得到，但蘭西發現，原來佐丹奴主席劉國權，今年二月至五月間、即股價反彈到五個幾六蚊嗰陣行使認股權，以介乎兩個六至兩個八毫三嘅價錢，增持二千五百萬股。
之後，劉主席再喺四月尾，喺場外以平均價五個三毫二仙半，沽出一千五百五十萬股，賺咗一個對開！至於另外嗰一千萬股，則繼續揸住，加上佢原有一千二百萬股，以噚日佐丹奴收市價計算，佢手上嘅股份市值超過一億一。
呢件事令蘭西諗起，零售大藍籌思捷環球會喺下個禮拜二，公布佢份經常令市場喜出望外嘅業績，而且以往績計，思捷主席邢李㷧，一向喜歡喺業績後向基金公司出售自己嘅股份，唔知今次又會唔會咁做呢？
電郵地址：[email protected]