昨日個市相當靜，成交得138億元，差唔多兩個半月以來最低。波幅夠晒窄，恒指高低只相差64點。恒指微升5點，基本上係好淡雙方和氣收場，不過唔少C輪溢價收縮，引伸波幅亦都細番少少，跌幅大嘅窩輪多過升幅大嘅窩輪，是日戰果又係輸家多過贏家。
恒指C輪9252：恒指收15227，同上周一最低14734比較，高出493點，幅度唔細。等機會，等恒指回到15100，預鬆50點，見守得穩嘅話，低位買恒指C輪。
恒指C輪約90件，最熱門嘅係明年2月到期嗰批。明年2月27日同日夠鐘嘅有11隻，其中5隻（9252、9295、9372、9378、9444），最低成交金額嗰件9444，都有274球易手，金額4800萬元。最勁嘅9295，超過2.5億元，霸住金額榜頭位。
炒輪其中1招，係將條件相若嘅輪比拼。結合各種條件，恒指C輪中最靚嘅係9252，輪價22仙，溢價4.7%（其他4隻同期熱門貨平均6.1%），槓桿率20.4倍（其他4隻平均21倍），有效槓桿率11.3倍（其他同類10.6倍），引伸波幅16.2%（其他同類18.4%）。
吼市升諗恒指P輪炒，未係時候。
章盛