港股家吓橫行整固，而美股周一又冇市，投資者多持觀望，港股噚日就在極窄幅度內上落，高位15244，低位15179，只相差64點，收市15227，微升5點，成交亦縮到只得138億元。
噚日話大市市底好強，估計今次調整，可能只需4至6個星期便完成。文章見報後，有窩輪界人士告知，話今個月底會有好多輪到期，唔排除有關人等會盡量㩒住個市，直到計完價為止。事實上，咁嘅可能性不能抹煞，但大市最多亦只係橫行，在14800至15400間上落，即使拖到9月底先整固完成，後市仍係向好，有望創出今年新高。
樓市看好，地產股表現大強勢，幾隻大藍籌嘅股價預期仍會有20%至30%的上升空間，想食大茶飯，有1隻，就係華人置業（127），揸佢1年半載，升幅有機會超過50%。
華置點解咁勁，就係佢旗下嘅零售商場組合，食正家吓自由行同迪士尼嘅概念，租約一到期，租金閒閒哋都升幾成到倍幾。未來一兩年，華置繼續將商場增值，租金收入絕對係以幾何級數式上升。
明年盈利料持續大增
睇番華置盤數，05年（12月結算）的上半年，營業額4.29億元，大減87.9%，主要係期內只有1個樓盤開售，盈利19.62億元，大增2.35倍，每股盈利96.7仙，升2.49倍，中期息派9仙，微增0.5仙。盈利大增，係投資物業重估增值16.1億元，若不計此數，半年的稅後利潤約6億元。
期內，租金收入微升至3.48億元，集團持有的皇室堡、銅鑼灣地帶及東角駅3個商場，樓面近20萬方呎，近期新簽租約升幅由50%至150%不等，保守估計下半年盈利（不計重估增值）可達8億元，而06年全年，租金收入更可上升到10億元。
華置現時發展中的地產項目，灣仔太原街預期可在年底前開售，而佔三分一權益的畢架山峰，估計應佔的盈利份額已可達9億元，呢兩個項目，將會入06年帳。
重有，華置已計劃將東英大廈重新發展為零售及綜合娛樂大樓，3年後完成，屆時集團每年的租金收入將會再飆升到14至15億元。
郭兆誠